Er du glad i å møte nye menneske og få gjester til å kjenne seg velkomne? Likar du å organisere og å halde orden? Nynorsk kultursentrum, musea for skriftkultur har ledig stilling som vertskapsansvarleg ved Aasentunet i Ørsta.
Stiftinga Nynorsk kultursentrum forskar på nynorsk språk og litteratur. Stiftinga formidlar kunnskap og kultur til heile landet gjennom turnear, arrangement og digitalt. Våre eigne arenaer er Aasentunet i Ørsta, Haugesenteret i Ulvik og Vinjesenteret i Vinje.
Vertskapsansvarleg er med på å utvikle publikumstilbodet i Aasentunet saman med resten av formidlingsavdelinga i Nynorsk kultursentrum. Du arbeider med å auke innteninga til Aasentunet gjennom marknadsføring og drift av butikk, serveringstilbod, omvisingar, arrangement, festival og utleigetilbod. Du vil også ha ansvar for å oppdatere informasjon i sosiale medium om arrangement, tilbod og hendingar i Aasentunet for ulike målgrupper.
Vi søkjer deg med fagbrev i reiseliv, sal eller tilsvarande fagområde og kompetanse. Røynsle frå liknande arbeid kan kompensere for formell kompetanse. Erfaring med kassasystem, oppgjer, varebestilling og lagerteljing, er ein fordel. Du må ta relevant kurs og sertifisering for skjenkeløyve, og får opplæring i dette.
Ei av hovudoppgåvene er å halde publikumstilbodet ope, og opne og stenge Aasentunet til vanleg. Det er difor viktig at du er tilgjengeleg dei fleste opningsdagane, inkludert faste vakter søndagar etter turnus. Utanom opningstidene vil det kunne vere utleige, arrangement, gruppe- og skulebesøk. Vertskapsansvarleg har då òg høve til å planleggje og førebu andre aktivitetar. Saman med formidlingsleiar set du opp turnus for opning, stenging og bemanning ved utleige, helger og kveld.
Stillinga er mellom 70 og 100 prosent. Endeleg stillingsstorleik blir avklara før tilsetjing. Den som blir tilsett må rekne med nokre reiser, til dømes til avdelingane våre i Ulvik og Vinje, og helge- og kveldsarbeid. Alle nye medarbeidarar får grundig opplæring. Hos oss nyttar alle nynorsk i skriftleg kommunikasjon. Nynorsk kultursentrum er medlem i arbeidsgivarorganisasjonen Virke og tilbyd ein idémyldrande bedriftskultur, engasjerte kollegaer, medlemskap i Statens pensjonskasse, avtalefesta pensjon, gruppelivsforsikring og løn etter avtale.
Stillinga er ledig frå 1. januar 2023 og har kontorstad ved Aasentunet i Ørsta.
Grip sjansen! Send søknad med CV og relevante attestar som eitt samla PDF-dokument seinast 20. oktober 2022 til . Hugs å ta med fullt namn, fødselsår, bustad og noverande stilling eller yrkestittel i søknaden.
Søkjarlister i Nynorsk kultursentrum er offentlege. Du kan opplyse om at du ønskjer å bli unnateke offentlegheit. Dette kan du søkje om og grunngi i e-posten som følgjer med søknaden.
Ta kontakt med formidlingsleiar Tone Slenes, tlf. Logg inn for å se kontaktinformasjon for meir informasjon om stillinga.
Epost:
Logg inn for å se kontaktinformasjonLogg inn for å se kontaktinformasjon